काठमाडौं,
काठमाडौंमा सञ्चालित थ्री नेसन्स कप फुटबलको उपाधि नेपालले जितेको छ । सोमबार दशरथ रंगशालामा भएको फाइनल खेलमा बंगलादेशलाई २ १ गोल अन्तरले पराजित गर्दै नेपालले उपाधि जितेको हो ।
नेपालका लागि १८ औं मिनेटमा सञ्जोग राई र ४२ औं मिनेटमा विशाल राईले गोल गर्नु भएको थियो । बंगलादेशले ८३ औं मिनेटमा गोल फर्काएको थियो । थ्री नेसन्स कपमा नेपाल, बंगलादेश र किर्गिस्तानको २३ वर्षमुनिको टिम सहभागी थिए ।
अनमार्क रहेका सन्जोग राईले १८ औं मिनेटमा गोल गर्दै नेपाललाई अग्रता दिलाउनु भएको थियो । राइको यो राष्ट्रिय टिममा पहिलो गोल हो । नेपाली टिमले १८ महिनापछि पहिलो पटक गोल गरेको हो । पछिल्लो पटक सन् २०१९ को सेप्टेम्बरमा भएको विश्वकप छनोटमा अन्जन विष्टले चाइनिज ताइपेइ विरुद्ध गोल गर्नुभएको थियो । त्यसपछिका ८ खेलमा नेपालले गोल गर्न सकेको थिएन ।
यस्तै ४२ औं मिनेटमा विशाल राईले वान भर्सेस वानमा गोल गर्दै नेपालको अग्रता दोब्बर पार्नुभयो । सन् २०१५ अगष्ट २१ मा भारतविरुद्ध खेल्दै डेब्यु गर्नु भएका विशालले नेपालका लागि गरेको यो चौथो गोल हो ।
विजेता टोली नेपालले ५ हजार अमेरिकी डलर पुरस्कार पाएको छ भने दोस्रो भएको बंगलादेशले ३ हजार डलर पायो । नेपाल र बंगलादेश फुटबलको फाइनलमा भिडेको यो तेस्रो पटक हो । यसअघि सन् १९९४ को पहिलो साग र १९९९ को आठौं सागमा यी दुई टोली फाइनलमा खेलेका थिए ।
पहिलो सागमा नेपाल विजयी भएको थियो भने १९९९ मा बंगलादेशले नेपाललाई दशरथ रंगशालामै पराजित गरेको थियो । २१ वर्षपछि नेपालले त्यस हारको बदला पनि दशरथ रंगशालामै लियो ।
