चीनबाट अनुदानको खोप ल्याउँदाको तस्वीर । साभारः गुगल
काठमाडौं,
सरकारले चीनको सिनोफार्म कम्पनीसँसँग खरिद गरेको आठ लाख डोज कोरोना विरुद्धको खोप नेपाल ल्याएको छ । सरकारले नेपाल एयरलाइन्सको वाइडबडी जहाजबाट शुक्रबार बिहान भेरोसेलको आठ लाख डोज खोप ल्याएको हो । नेपाल सरकारले चीनको सिनोफार्म कम्पनीसँग ४० लाख डोज खोप खरिदको सम्झौता गरेको थियो ।
सोही सम्झौता अनुसार भेरोसेल खोपको पहिलो खेप शुक्रबार बिहान काठमाडौं ल्याइएको हो । आज आठ लाख डोज भेरोसेल खोप ल्याइएको र बाँकी खोप थप उडानमार्फत् ल्याइने स्वास्थ्य सेवा विभागको खोप शाखाका प्रमुख डा. झलक शर्मा गौतमले जानकारी दिनुभयो ।
पहिलो खेप खोप ल्याउन वाइडबडी जहाज बिहीबार साँझ चीनको राजधानी बेइजिङ गएको थियो । साउन ८ गतेसम्म तीनवटा उडानमार्फत खोप नेपाल ल्याइने स्वास्थ्य तथा जनसंख्या मन्त्रालयले जनाएको छ । निगमको वाइडबडी विमान यसपछि असार ३१ र साउन ७ मा बाकी खोप ल्याउन बेइजिङ जाने तालिका छ ।
अब ६० वर्षभन्दा मुनिको समूहलाई र पहिला छुटेकाहरुलाई पनि खोप दिइने डा. गौतमले बताउनुभयो । अब सरकारले यसअघि तोकेको प्राथमिकता अनुसार ५५ वर्षदेखि ५९ वर्ष उमेर समूहकालाई खोप दिइनुपर्छ । अन्य अत्यावश्यक सेवामा रहेकालाई पनि प्राथमिकतामा राखिने डा. गौतमको भनाइ छ ।
