काठमाडौं,
प्रधानमन्त्री केपी शर्मा ओलीले मन्त्रिपरिषद्लाई पूर्णता दिनु भएको छ । सत्तारुढ नेकपा एमालेबाट ६ मन्त्री र एक राज्यमन्त्री नियुक्त गर्नुभएका ओलीले जनता समाजवादी पार्टी (जसपा) को महन्थ ठाकुर पक्षबाट एक मन्त्री थप्नु भएको छ । यससँगै मन्त्रिपरिषद्ले पूर्णता पाएको छ । २५ सदस्यीय मन्त्रिपरिषदमा तीन उपप्रधानमन्त्री छन् भने १८ मन्त्री र तीन राज्यमन्त्री छन् ।
राष्ट्रपति निवास शितल निवासमा राष्ट्रपति विद्यादेवी भण्डारीले आज अपरान्ह नवनियुक्त मन्त्रीहरूलाई सपथ खुवाउनु भएको छ ।
प्रधानमन्त्री केपी शर्मा ओलीले गृहमन्त्रीमा एमालेका खगराज अधिकारीलाई नियुक्त गर्नुभएको थियो । यस्तै जसपाका नेता राजकिशोर यादव उद्योग मन्त्री र नैनकला थापा सञ्चार मन्त्री नियुक्त हुनु भएको छ ।
संघीय मामिला तथा सामान्य प्रशासन मन्त्रीमा गणेश पहाडी, वन मन्त्रीमा नारदमुनि राना नियुक्त हुनुभएको हो । यस्तै कृषि मन्त्रीमा ज्वालाकुमारी साह, विना विभागीय मन्त्रीमा मोहन बानियाँ र वन राज्यमन्त्रीमा आशा विकले आज सपथ लिनु भएको छ ।
यसअघिको मन्त्रिपरिषद बिस्तारको विरुद्ध सर्वोच्चमा परेको रिटमाथि सर्वोच्चले कारण देखाउ आदेश जारी गरेकोमा जवाफ नपठाउँदै प्रधानमन्त्री ओलीले मन्त्रिपरिषद बिस्तार गरेर जवाफ दिएको टिप्पणी हुन थालेको छ ।
