काठमाडौं,
सरकारले वीर अस्पतालको नयाँ भवनलाई कोभिड–१९ को युनिफाइड केन्द्रीय अस्पताल बनाउने निर्णय गरेको छ। मन्त्रिपरिषदको शनिबार प्रधानमन्त्री निवास बालुवाटारमा बसेको आकस्मिक बैठकले वीर अस्पतालको नयाँ भवनलाई सुरूमा ५ सय शय्याको युनिफाईड कोभिड अस्पताल बनाउने निर्णय गरेको उद्योग वाणिज्य तथा आपूर्तिमन्त्री लेखराज भट्टले जानकारी दिनुभयो ।
त्यसका लागि मन्त्रिपरिषद बैठकले कोभिड १९ केन्द्रीय अस्पताल सञ्चालन आदेश, २०७८ पास गरेको छ । कोरोना संक्रमण बढ्दै गएको भन्दै त्यस्तो निर्णय लिइएको हो ।
यसअघि कोभिड संकट व्यवस्थापन केन्द्र (सीसीएमसी) को बैठकले वीर अस्पतलालको नयाँ भवनलाई कोभिड–१९ विशेष अस्पताल बनाउनका लागि सिफारिस गरेको थियो ।
वीरमा कम्तीमा ८ सय शय्या सञ्चालन गर्न सकिने स्वास्थ्य मन्त्रालयको आँकलन छ । साधारण बिरामीलाई एक सय शय्या छुट्याएर सात सय शय्या कोरोना उपचारमा प्रयोग गर्ने तयारी स्वास्थ्यको हो ।
