काठमाडौं,
लोकसेवा आयोगले बिहीबार आयोगका तर्फबाट सम्पादित कामहरु समेटिएको एकसट्ठीऔं वार्षिक प्रतिवेदन राष्ट्रपति समक्ष पेश गरेको छ । राष्ट्रपति कार्यालय शीतल निवासमा आयोजित कार्यक्रममा आयोगका अध्यक्ष उमेश प्रसाद मैनालीले राष्ट्रपति विद्यादेवी भण्डारी समक्ष आर्थिक वर्ष २०७६/७७ को वार्षिक प्रतिवेदन पेश गर्नुभएको हो ।
यो अवधिमा निजामती सेवातर्फ ३ सय ४ जना उम्मेदवारहरु स्थायी नियुक्तिका लागि सिफारिस भएको र ८ वटा विज्ञापनका कुल १२ पदका लागि लिइएको परीक्षामा कुनै पनि उम्मेदवार उत्तिर्ण हुन नसकेको प्रतिवेदनमा उल्लेख छ । स्थानीय सेवातर्फ भने प्रतिवेदन अवधिमा ८ हजार ६ सय ३९ उम्मेदवारहरु स्थायी नियुक्तिका लागि सिफारिस भएका छन् ।
कोभिड १९ को महामारीका कारण परीक्षाहरु स्थगित गर्नुपरेकाले यस वर्ष सिफारिस संख्या कम देखिएको हो । नेपालको संविधानको धारा २९४ अनुसार आयोगले राष्ट्रपतिसमक्ष प्रतिवेदन पेस गर्नुपर्ने व्यवस्था छ । आयोगका वर्तमान पदाधिकारीहरुको नियुक्ति पछिको यो छैठौं तथा अन्तिम प्रतिवेदन हो ।
आगामी चैत्र १० गतेदेखि आयोगका सबै पदाधिकारीको पदावधि समाप्त हुँदैछ ।
