चौतारा,
नेपाली क्रिकेटर (लेग स्पिनर) सन्दिप लामिछानेले सिन्धुपाल्चोकको जुगल गाउँपालिका २ लिदिका पहिरो पीडितको अस्थायी आवास निर्माणका लागि आवश्यक सामग्री सहयोग गर्नुभएको छ । गत वर्षको पहिरोले विस्थापित भएर बाँसखर्कमा बसेका पहिरो प्रभावितको अस्थायी आवास निर्माणका लागि जस्ता पाता, फलामे ट्रस, पोल लगाएत सामग्री सहयोग गर्नुभएको हो ।
सोमबार चौतारा पुगेर लामिछानेले उक्त सामग्री जिल्ला विपद व्यवस्थापन समितिका अध्यक्ष एंव प्रमुख जिल्ला अधिकारी अरुण पोखरेललाई हस्तान्तरण गर्नुभएको हो । प्रमुख जिल्ला अधिकारी पोखरेलका अनुसार विपद व्यवस्थापन समितिको पहल मार्फत बाह्रबिसे, बाँसखर्क र भोटेकोसीमा एकसय टहरा बनाउने लक्ष्य अनुसार उक्त सामग्री प्राप्त भएको हो ।
लामिछानेको टोलीले मेलम्ची बाढीबाट प्रभावितका लागि मेलम्चीमा स्वास्थ्य शिविर पनि सञ्चालन गरेको थियो ।
