चितवन,
चितवनमा सम्पन्न गौतमबुद्ध कप टी २० क्रिकेट प्रतियोगिताको उपाधी टिम राप्तीले जितेको छ । धुर्मुस सुन्तली फाउण्डेसनले निर्माण गरिरहेको गौतमबुद्ध अन्तर्राष्ट्रिय क्रिकेट मैदानको छेउमा रहेको नमुना क्रिकेट खेलमैदानमा मँगलबार भएको फाइनलमा राप्तीले टिम नारायणीलाई ९ रनले पराजित गर्दै उपाधी जितेको हो ।
टस हारेर पहिले ब्याटिङ गरेको नारायणीले निर्धारित २० ओभरमा ८ विकेट गुमाएर एक सय ४३ रन बनाएको थियो । एक सय ४४ रनको लक्ष्य पछ्याएको नारायणीले निर्धारित २० ओभरमा ९ विकेट गुमाएर एक सय ३४ रन मात्र बनाउन सक्यो ।
टिम राप्तीको कप्तानी विनोद भण्डारीले गरेका थिए भने टिम नारायणीको कप्तानी करण केसीले गरेका थिए । प्रतियोगिताअघि नारायणीको कप्तान पारस खड्कालाई तोकिए पनि उनी एक दिनअघि कोरोना संक्रमित भएपछि चितवन गएनन् । पहिलो खेलमा सुवास खकुरेलले नारायणीको कप्तानी गरेका थिए । तर उनी पनि घाइते भएपछि करण केसीले नारायणीको कप्तानी गरेका हुन् ।
बागमती प्रदेश क्रिकेट संघको आयोजनामा भएको प्रतियोगितामा राप्ती, बागमती र नारायणी गरी तीनवटा टिमले प्रतिस्पर्धा गरेका थिए । राप्तीले लिगमा टिम बागमती र टिम नारायणी दुवैलाई हराएको थियो भने फाइनलमा पनि टिम नारायणीलाई पराजित गर्दै उपाधि जितेको हो ।
