धादिङ – धादिङको थाक्रे गाँउपालिकाको महादेवबेशीबाट मकवानपुरको थाहा नगरपालिका जोड्ने आग्रा सम्मको सडकलाई कालोपत्रे गर्नका लागि विस्तृत अध्ययन प्रतिवेदन (डिपीआर) सूरु भएको छ ।
महादेवबेसी– निगाले-आग्रा सडकमा अहिले भईरहेको अप्ठ्यारो अवस्थालाई मध्यनजर गरि सडक निर्माणका लागि डिपीआर सुरु गरिएको थाक्रे गाउँपालिका वडा नं ३ का वडा अध्यक्ष बिजय तामाङले बताए । सडकको डिपीआरको काम सकिने बित्तिकै बोलपत्रको तयारी गर्ने तामाङले बताए । अहिले गरेको डिपिआरले १० किलोमिटर सडक कालोपत्रे हुने उनले बताए।
धादिङ जिल्लाको महादेवबेसी बाट मकवानपुर जिल्लाको थाहा नगरपालिका जोड्ने सडकको अवस्था कच्चि भएकाले सवारी आवतजावतमा समस्या भईरहेको छ । यहि समस्याको निराकरणका लागि सडक कालोपत्रे गर्ने योजना अघि सारेको अध्यक्ष तामाङले बताए । अबको केहि दिन देखिनै काम सुरु हुने समेत उनले जानकारी दिए ।
