काठमाडौं,
चीनले नेपाललाई कोरोना भाइरस विरुद्धको १० लाख डोज खोप अनुदान दिने भएको छ । बुधबार नेपाली समकक्षी विद्यादेवी भण्डारीसँग भएको टेलिफोन कुराकानीमा चिनियाँ राष्ट्रपति सी जिनफिङले १० लाख डोज खोप अनुदान दिने घोषणा गरर्नुभएको हो ।
दुई राष्ट्रपतिको टेलिफोन संवादपछि नेपालका लागि चिनियाँ राजदूत हाउ यान्छीले चीनले नेपाललाई अनुदानमा खोप उपलब्ध गराउने जानकारी दिनुभएको छ । चीनले यसअघि नेपाललाई ८ लाख डोज कोरोना विरूद्धको भेरोसिल खोप अनुदान दिएको थियो । राष्ट्रपति सीले घोषणा गरेको नयाँ अनुदानसमेत जोड्दा चीनले नेपाललाई कुल १८ लाख डोज खोप प्रदान गर्ने छ ।
भण्डारी र जिनफिङबीच झन्डै पौने घन्टा कुरा भएको राष्ट्रपति भण्डारीका सञ्चार विज्ञ टीका ढकालले जानकारी दिनुभयो । कुराकानीका क्रममा राष्ट्रपति भण्डारीले नेपाल सबै नेपालीलाई पुग्ने खोप चीनबाट किन्न इच्छुक रहेको उल्लेख गर्दै त्यसका लागि पहल गरिदिन अनुरोध गर्नुभएको थियो ।
जवाफमा राष्ट्रपति चिनफिङले नेपालजस्तो मित्र राष्ट्रलाई सहयोग गर्न आफूले पहल गर्ने बताउनुभएको ढकालले जानकारी दिनुभयो ।
