काठमाडौं,
पछिल्लो २४ घण्टामा ६ हजार ८ सय ९१ जनासहित हालसम्म ३ लाख ५२ हजार ४ सय १४ जनाले कोरोना जितेका छन् । कोरोना भाइरस संक्रमणबाट पछिल्लो २४ घण्टामा एक सय ९६ जनाको मृत्यु भएको स्वास्थ्य तथा जनसंख्या मन्त्रालयले जनाएको छ ।
योसँगै नेपालमा कोरोना संक्रमणबाट मृत्यु हुनेको संख्या ५ हजार ४ सय ११ पुगेको छ । पछिल्लो २४ घण्टामा देशभर ८ हजार २ सय ३ जनामा कोरोना भाइरसको संक्रमण पुष्टि भएको छ । २० हजार २ सय ८६ नमुनाको पीसीआर परीक्षण गर्दा ८ हजार एक सय ३६ जना र ६ सय ९३ नमुनाको एन्टिजेन परीक्षण गर्दा ६७ जनामा कोरोना भाइरसको संक्रमण देखिएको हो ।
नेपालमा कोरोना संक्रमितको कुल संख्या ४ लाख ७२ हजार ३५४ पुगेको छ । तीमध्ये १ लाख १४ हजार ५ सय २९ जना सक्रिय संक्रमित रहेको मन्त्रालयले जनाएको छ । उनीहरुमध्ये एक लाख ७ हजार ८२ जना होम आइसोलेसनमा छन् भने ७ हजार ४ सय ४७ जना संस्थागत आइसोलेसनमा छन् । यस्तै एक हजार ५ सय ९० जनाको आईसीयू र ३ सय ९० जनाको भेन्टिलेटरमा उपचार भइरहेको छ ।
गत २४ घण्टामा थपिएका संक्रमितमध्ये २ हजार ६ सय ३५ जना काठमाडौं उपत्यकाका हुन् । जसमा काठमाडौंका २ हजार ४९, ललितपुरका ३ सय ६५ र भक्तपुरका २ सय २१ जना छन् । मन्त्रालयका अनुसार प्रदेश १ मा १ हजार २ सय ३४, प्रदेश २ मा ५ सय १५, बागमती प्रदेशमा ३ हजार ९ सय २१, गण्डकीमा, ६ सय ५०, लुम्बिनीमा एक हजार ४२, कर्णालीमा ४ सय ५८ र सुदूरपश्चिम प्रदेशमा ३ सय १६ जना संक्रमित थपिएका छन् ।
