एजेन्सी,
भारतको महाराष्ट्र राज्यको नासिकको डाक्टर जाकिर हुसेन अस्पतालमा अक्सिजन नपाएर २२ जना कोरोना संक्रमित बिरामीको मृत्यु भएको छ । अस्पतालमा बुधबार बिहान अस्पतालको बाहिर रहेको अक्सिजन ट्यांकर चुहिँदा करिब आधा घण्टा अस्पतालमा अक्सिजन आपूर्ति अवरुद्ध भएको थियो ।
जसले गर्दा भेन्टिलेटरमा उपचार भइरहेका करिब एक सय ५० सिकिस्त बिरामीले आधा घण्टासम्म अक्सिजन पाएनन् । अक्सिजन आपूर्ति अवरुद्ध हुँदा तीमध्ये कम्तीमा २२ जनाको मृत्यु भएको भारतीय सञ्चारमाध्यमहरुले जनाएका छन् । अक्सिजन चुहिएपछि अस्पताल परिसर पूरै कुहिरीमण्डल बनेको दृश्य सार्वजनिक भएको छ ।
नासिक नगर निगम आयुक्त कैलाश यादवले भेन्टिलेटरमा उपचाररत २३ बिरामी मध्ये २२ जनाको मृत्यु भएको पुष्टि गर्नुभएको बीबीसीले लेखेको छ । लामो प्रयासपछि प्राविधिकहरु चुहावट रोक्न सफल भएका थिए ।
घटनालगत्तै अक्सिजन आवश्यक सिकिस्त बिरामीहरुलाई तत्कालै अन्य अस्पतालमा सारिएको थियो । घटनाका सम्बन्धमा महाराष्ट्र राज्य सरकारले छानबिन गर्ने भएको छ । भारतमा कोरोना संक्रमण तीव्र बनेसँगै मुलुकभर अक्सिजनको हाहाकार मच्चिएको छ । नासिक अस्पतालमा हरेक दिन एक सय ३९ मेट्रिक टन अक्सिजन आवश्यक पर्ने गरेकोमा अहिले दैनिक ८४ मेट्रिक टन मात्रै अक्सिजन आपुर्ति भइरहेको बीबीसीले लेखेको छ ।
यस घटनापछि प्रधानमन्त्री नरेन्द्र मोदी तथा भारतीय काँग्रेसका नेता राहुल गान्धीले दुःख व्यक्त गर्दै मृतकका परिवारजनमा समवेदना प्रकट गर्नुभएको छ ।
