काठमाडौं,
स्वास्थ्य तथा जनसंख्या मन्त्रालयले जेठ अन्तिम साता र असार पहिलो सातामा दैनिक ११ हजार जना संक्रमित हुने प्रक्षेपण गरेको छ । असार पहिलो सातामा सक्रिय संक्रमितको संख्या ६ लाख पुग्ने प्रक्षेपण गरिएको स्वास्थ्यमन्त्री हृदयेश त्रिपाठीले बताउनुभयो ।
नेपालमा कोरोनाभाइरस (कोभिड १९) को संक्रमण जेठ–असारमा उच्च विन्दुमा पुग्ने प्रक्षेपण गरिएको हो ।
‘नहोस् तर अहिलेको ट्रेण्डका आधारमा यो प्रक्षेपण गरिएको हो’ उहाँले भन्नुभयो, ‘त्यसका लागि आवश्यक तयारी पनि गरिएको छ ।’
अहिले युवा र कम उमेर समूहमा नयाँ भेरियन्टको संक्रमण देखिनु डरलाग्दो भएको मन्त्री त्रिपाठीको भनाइ छ । यसैबीच मन्त्रालयले संक्रमणको चेन ब्रेक गर्न उपत्यकासहित ठूला शहरहरुमा एक महिना विद्यालय बन्द गरेर अनलाइन कक्षा सञ्चालन गर्न सिफारिस गरेको छ । उपत्यकासहित १५ वटा जिल्लाका ठूला शहरमा रहेका विद्यालय एक महिना बन्द गर्नका लागि सिसिएमसीमा प्रस्ताव गरेको सचिव लक्ष्मण अर्यालले जानकारी दिनुभयो ।
‘काठमाडौं उपत्यकासहित पोखरा, विराटनगर, वीरगन्जसहित १५ वटा ठूला सहर छन्। यहाँ संक्रमण फैलन सक्ने भएकोले कम गर्न खोजेको हो । अहिलेको नयाँ भाइरस एकदम संक्रमणशील छ । त्यसैले एकैचोटी धेरै मानिस बिरामी भएर अस्पताल आए भने उपचार गर्न सकिँदैन,’ उहाँले भन्नुभयो ।
स्वास्थ्यमन्त्री हृदयेश त्रिपाठीका अनुसार विदेशबाट आएकाहरुलाई मुख्य नाकामा नै टेष्ट गर्ने र संक्रमितलाई आइसोलेसन सेन्टर वा अस्पतालमा पठाइने रणनीति बनाइएको छ । यसका लागि मुख्य नाकामा एक हजार जना क्षमताको होल्डिङ सेन्टर बनाउने प्रक्रिया शुरु भएको उहाँको भनाइ छ ।
काठमाडौं उपत्यकाका सबै अस्पताललाई तयारी अवस्थामा राख्न भनिएको भन्दै स्वास्थ्यमन्त्री त्रिपाठीले भन्नुभयो, ‘हाम्रो प्रयत्न मुलुकलाई फेरि बन्दाबन्दीमा पुग्न नदिने हो ।’
