एजेन्सी,
भारतीय प्रधानमन्त्री नरेन्द्र मोदीले कोरोना भाइरस कोभिड १९ विरुद्धको खोपको दोस्रो डोज खोप लगाउनु भएको छ । मोदीले आज दिल्लीस्थित एम्स अस्पतालमा पुगेर कोरोना विरुद्धको दोस्रो खोप लगाउनु भएको भारतीय सञ्चार माध्यमले जनाएका छन् ।
खोप लगाएको तस्वीर प्रधानमन्त्रीले आफ्नो आधिकारिक ट्विटर हेण्डलमार्फत सार्वजनिक पनि गर्नुभएको बीबीसीले लेखेको छ । कोरोना भाइरसलाई पराजित गर्ने केही महत्वपूर्ण तरिकामध्ये खोप कार्यक्रम पनि एक भएको उहाँले लेख्नु भएको छ । उहाँले खोप लगाउनका लागि योग्य व्यक्तिहरुलाई अनिवार्य आफ्नो नाम दर्ता (पञ्जिकरण) गराउन पनि उहाँले आग्रह गर्नुभएको छ ।
समाचार एजेन्सी एएनआइका अनुसार पञ्जावका नर्स निशा शर्माले प्रधानमन्त्री मोदीलाई कोभिड १९ विरुद्धको खोपको दोस्रो डोज लगाइदिनु भएको थियो । मोदीले गएको १ मार्चमा कोभिड विरुद्धको खोपको पहिलो डोज लगाउनु भएको थियो । उहाँले भारत बायोटेकले बनाएको कोभ्याक्सिन छनोट गर्नुभएको भारतीय सञ्चारमाध्यमले जनाएका छन् ।
