धनगढी,
बैतडीको दोगडाकेदार गाउँपालिका–७ का १७ वर्षीया किशोरी भागरथी भट्टको बलात्कारपछि हत्या गरेको अभियोगमा उनी अध्ययन गर्ने विद्यालयका एक विद्यार्थी पक्राउ परेका छन् । घटनाको १३ औँ दिन मँगलबार प्रहरीले सनातन धर्म माध्यमिक विद्यालयमा अध्ययरत भागरथीकै सहपाठीलाई पक्राउ गरेको हो ।
आरोपी युवाले बलात्कार र हत्या स्वीकार गरेको पनि प्रहरीले जानकारी दिएको छ । भागरथीको छिमेकीसमेत रहेका उनको विवरण भने आज मात्रै सार्वजनिक गरिने सुदूरपश्चिम प्रहरीका प्रवक्ता एसएसपी मुकेश सिंहले जानकारी दिनुभयो ।
प्रहरीका अनुसार सुरुमा भागरथीलाई सानो भीरबाट लडाइदिएको र घाइते अवस्थामा बलात्कार गरेको ती अभियुक्तले प्रहरीसमक्ष बयान दिएका छ न् । भागरथीको बलात्कारसमेत भएको पोस्टमार्टम रिपोर्टले पुष्टि गरिसकेको छ ।
त्यसैदिन विद्यालयबाट फर्किँदा बाटोमा बलात्कार तथा हत्या गरेको उनले स्वीकारेको प्रहरीको भनाइ छ । स्थानीय सनातन धर्म माविमा कक्षा १२ मा पढ्ने भागरथी २१ माघमा विद्यालयबाट फर्किँदा सम्पर्कविहीन हुनुभएको थियो । अर्को दिन स्थानीय लवलेक जंगलमा उहाँको शव भेटिएको थियो ।
घटनाको अनुसन्धानका लागि सुदूरपश्चिमका प्रहरी प्रमुख डिआइजी उत्तम सुवेदी १० दिनदेखि घटनास्थल बैतडीको दोगडाकेदार गाउँमै हुनुहुन्छ । सुदूरपश्चिम सरकारले भागरथीको परिवारलाई पाँच लाख रुपैयाँ राहत दिने घोषणा गरेको छ ।
