काठमाडौँ – सिद्धार्थ बैंक लिमिटेडका प्रमुख कार्यकारी अधिकृत (सीइओ) विरुद्ध उजुरी परेको छ । बैंकका सीइओ सुन्दर प्रसाद कडेलले हिसाव किताव तलमाथि पारेको भन्दै कारवाही गर्न माग गर्दै अध्यक्ष समक्ष उजुरी परेको हो ।
उनले तेह्र अर्व एक करोड चौवन्न लाख नब्बे हजार रुपैयाँको हिसाव किताव तलमाथि पारेको भन्दै सूचना अभियान्ता अंगराज भारतीले बैंकको अध्यक्ष कहाँ उजुरी गरेका हुन् । अर्थिक वर्ष २०७७/२०७८ मा बैंकले उत्पादनशिल क्षेत्रमा गरेको कर्जा लगानीबारे नेपाल राष्ट्र बैंकमा गलत विवरण पेश गरेको भन्दै भारतीले उजुरी दिएका हुन् ।
भारतीले बैंकलाई अब्बल देखाउन सीइओले ठूलो रकमको हिसाव तलमाथि पारेको आरोप लगाएका छन् । आर्थिक वर्ष २०७७/२०७८ को कार्तिक महिनामा बैंकको उत्पादनशिल क्षेत्रको साना, घरेलु तथा मझौला उद्योग क्षेत्रमा चौहत्तर करोड ६१ हजार रुपैयाँ मात्र कर्जा प्रवाह गरेका थियो । सो कर्जा मंसीर महिनामा आई पुग्दा तेह्र अर्ब पचहत्तर करोड ६१ लाख पुगेको बैंकको रिर्पोटमा उल्लेख छ ।
नेपाल राष्ट्र बैंकको निर्देशन अनुसार साना, घरेलु, मझौला क्षेत्रमा एक करोड भन्दा मुनिको कर्जा मात्र समावेश गर्ने पाउने भएकोले मंसीर महिनामा मात्र बैंकले सो क्षेत्रमा न्यूनतम पनि १ हजार ३ सय १ वटा नयाँ कर्जा स्विकृत गरेको देखिन्छ । बैंकले एक महिनामा न्यूनतम १ हजार ३ सय १ वटा नयाँ कर्जा स्विकृत गर्न सम्भव नभएको भारतीको बुझाई छ । भारतीले यसरी अर्को शिर्षकको रकम अर्कोमा राख्न सक्ने सीइओले जनताको निक्षेप पनि एक व्यक्तिको रकम अर्को व्यक्ति खातामा राख्न सक्ने भन्दै उनलाई तत्काल कारवाही गर्न माग गरेको जनाएका छन् ।
भारतीले असम्भव हुने काम देखाएर बैंकले कर्जाको शिर्षक हेरफेर गरेर बदमासी गरेको भन्दै सीइओलाई हदैसम्मको कारवाही गर्न माग गरेका छन् । कडेल २०७८ साल मंसिर २७ गते बैंकको प्रमुख कार्यकारी अधिकृतमा नियुक्त भएका थिए । उनैले २०७७/७८ को बार्षिक साधारणसभा गराएका थिए ।
बैंकले राष्ट्र बैंकको निर्देशन अनुसार अनेत्रको शिर्षक साना, घरेलु, मझौला क्षेत्र उद्योग शिर्षकमा राखेको जनाएको छ । तर उक्त समयमा राष्ट्र बैंकले कुनै पनि निर्देशन जारी गरेको छैन ।
