काठमाडौं,
भारत सरकारले प्रधानमन्त्री केपी शर्मा ओलीलाई कोरोना विरूद्धको १० लाख डोज खोप हस्तान्तरण गरेको छ । नेपालका लागि भारतीय राजदूत विनयमोहन क्वात्राले प्रधानमन्त्री केपी शर्मा ओलीलाई बिहीबार बालुवाटारमा आयोजित कार्यक्रममा भारत सरकारको तर्फबाट उपहार स्वरूप कोरोनाविरूद्धको १० लाख डोज खोप हस्तान्तरण गर्नुभएको हो ।
कार्यक्रममा बोल्दै प्रधानमन्त्री केपी शर्मा ओलीले नेपाललाई थप ४० लाख डोज खोप चाहिएको भन्दै भारत सरकारले नेपाललाई कसरी उपलब्ध गराउन सक्छ छलफल गर्न आवश्यक रहेको बताउनु भएको थियो । उहाँले नेपालले आवश्यक खोपहरू खरिद गर्न तयार रहेको भन्दै पूर्वसर्तहरू भए मान्न तयार रहेको बताउनु भएको छ ।
प्रधानमन्त्री ओलीले भारतले नेपाललाई कोरोनाविरूद्धको खोप सहयोग गर्नु मित्रताको प्रतीकको रूपमा रहेको उल्लेख गर्दै यसले दुई देशबीचको एकतालाई देखाएको उल्लेख गर्नु भएको छ ।
