मानबहादुर (एमबी) खड्का
एता गाउँतिर एउटा खेती छ
उता शहर तिर अर्को खेती छ
एता खेतका गरा तिर
बाउसे रोपार हिलो छ्यापा छ्याप गर्छन्
र रोपाईं जात्रा मनाउछन्
उता शहरका महल तिर मालिकहरु
उस्तै गरि हिलो छ्यापाछ्याप गर्छन्
र भैंसी जात्रा मनाउँछन्
असार १५ धान पर्व रे
खेत देखे पनि नदेखे पनि
माटो टेके पनि नटेके पनि
शक्ति र सितलता पाउन
मान्छे दही चिउरा खान्छन्
दही चिउरा खाए पनि नखाए पनि
दही चिउरे कुरा गर्न छोडदैनन्
एता गाउँतिर एउटा खेती गर्छन्
उता शहर तिर अर्को खेती गर्छन्
म सानो छँदा स्कुलमा
नेपाल कृषिप्रधान देश हो भन्थे गुरुले
हो त रहेछ
गुरु वचन सँधै सत्य हुन्छ भन्थे बा
हो त रहेछ ।
