काठमाडौं,
भोलीदेखि सुरु हुने कोरोना भाइरस (कोभिड–१९) विरुद्धको खोप अभियानका लागि सबै प्रदेशमा खोप पुगेको छ । हिजो (सोमबार) सातवटै प्रदेशको भण्डारण केन्द्रहरूमा खोप पुगेको स्वास्थ्य तथा जनसङ्ख्या मन्त्रालयका खोप सेवा शाखाका प्रमुख डा. झलक शर्मा गौतमले जानकारी दिनुभयो ।
चार लाख ३० हजार जनालाई लक्षित गरेर पहिलो चरणमा लगाइने खोप प्रदेशबाट जिल्ला–जिल्लामा पठाउन थालिएको प्रमुख शर्माको भनाइ छ । कोरोनाको खोप लगाएपछि स्वास्थ्यसम्बन्धी कुनै समस्या देखिए सरकारले निःशुल्क उपचार गर्ने जनाएको छ ।
खोप लगाउँदा स्वास्थ्य समस्या आए जुन ठाउँमा खोप लगाइएको हो, सोही ठाउँमा उपचार हुने स्वास्थ्य तथा जनसंख्या मन्त्रालयका अधिकारीहरूले जानकारी दिएका छन् । मन्त्रालयका सहप्रवक्ता डा. समिर अधिकारीले खोप लगाएपछि स्वास्थ्यमा समस्या आए उपचार गर्न समस्या नभएको तर पहिलो चरणको खोप अभियान भएकाले धेरै स्वास्थ्यकर्मीलाई परामर्शको आवश्यकता रहेको बताउनुभयो ।
कोभिड खोप लगाएको केही मिनेटदेखि दुई घन्टाभित्रमा शरीर फुस्रो हुने, श्वासप्रश्वासमा समस्या आउने, मुटुको धड्कन कम हुने वा रक्तचाप कम हुने र वान्ता हुनेजस्ता जोखिमपुर्ण लक्षण हुने हुँदा केही समय स्वास्थ्यकर्मीको परामर्शमै रहनुपर्ने बताइएको छ ।
तर, खोप लगाएको वरपर फोका उठ्ने, चिलाउने, गर्मी हुने, ह्याच्छिउँ आउनेजस्ता समस्या देखिए नआत्तिन आग्रह गरिएको छ ।
कुन प्रदेशमा कति जनाले खोप पाउने ?
स्वास्थ्य मन्त्रालयका अनुसार पहिलो चरणमा सबैभन्दा बढी वाग्मती प्रदेशमा ६३ हजार ३ सय ६० जनालाई र सबैभन्दा कम कर्णाली प्रदेशमा ११ हजार ५ सय ३२ जनालाई खोप दिइनेछ।
लुम्बिनी प्रदेशमा ३९ हजार ४ सय ९५, प्रदेश १ मा ३५ हजार ४ सय ५६ र प्रदेश २ मा ३४ हजार ८ सय ४ जनालाई खोप लगाइने तयारी छ । त्यस्तै गण्डकी प्रदेशमा १७ हजार ६ सय ३० र सुदूरपश्चिममा १६ हजार २ सय ९३ जनाले खोप लगाउन पाउने भएका छन् । यो संख्या अद्यावधिक भइरहेकाले केही हेरफेर हुन सक्ने पनि मन्त्रालयले जनाएको छ।
जिल्लागत रूपमा सबैभन्दा बढी काठमाडौंमा ३१ हजार ५ सय १९ जना लाभान्वित हुनेछन् भने सबैभन्दा कम मुगुमा ९४ जनाले पहिलो चरणको खोप पाउनेछन् ।
