काठमाडौँ – फोहोर बोकेर बन्चरेडाँडा गएका गाडीलाई अवरोध गर्न खोज्ने स्थानीयलाई प्रहरीले हटाएको छ । पक्राउ परेका स्थानीयलाई छाड्नुपर्ने भन्दै उनीहरूले बिहीबार बिहान केहीबेर गाडी रोकेका थिए ।प्रहरी परिचालन गरेपछि उनीहरू पछि हटेको काठमाडौं महानगरपालिकाका प्रवक्ता नवीन मानन्धरले जानकारी दिए ।
पार्किङ गरेर राखिएको फोहोर बोकेका गाडीसहित अन्य सवारीसाधन तोडफोड गरेको भन्दै प्रहरीले धुनिबेंसी-१ का दीपेश कार्कीलाई पक्राउ गरेको थियो । उनको रिहाइको माग गर्दै स्थानीयले आन्दोलन गरेका हुन् । प्रवक्ता मानन्धरले कानुनी प्रक्रिया पूरा भएपछि मात्रै आरोपित रिहाइ हुने बताए । प्रहरीले स्थानीयलाई हटाएपछि शान्तिपूर्ण रुपमा बन्चरेडाँडा ल्यान्डफिल साइटमा फोहोर विसर्जन भइरहेको मानन्धरले जानकारी दिए । महानगरपालिकाका इन्जिनियर सरकारदिप श्रेष्ठले अन्य दिनको तुलनामा धेरै गाडीहरुले फोहोर विसर्जन गरेको बताए ।
यस्तै, धेरै मात्रामा फोहोर थुप्रिएपछि उपत्यकाको फोहोर ढुवानीमा काठमाडौं महानगरपालिकालाई विभिन्न संघ(संस्थाहरूले सघाइरहेका छन् । महानगरपालिका र निजी क्षेत्रसँग भएका गाडीबाट ढुवानी गर्दा थुप्रिएको फोहोर हटाउन गर्न धेरै समय लाग्ने भएपछि महानगरले नेपाल टिपर तथा ट्रक व्यवसायी संघसँग सहमति गरेको छ भने विभिन्न कन्स्ट्रक्सन कम्पनीहरूले महानगरलाई निस्शुल्क रुपमा फोहोर ढुवानी गर्न सहयोग गर्ने भएका छन् । हाल दैनिक रुपमा १८० वटा टिपरले फोहोर विसर्जन गर्दै आएका छन् ।
