काठमाडौं – बागमती प्रदेशसभाले आज आगामी आर्थिक वर्षको बजेट पास गर्ने तयारी गरेको छ ।
आज प्रदेशसभामा आर्थिक विधेयकमाथि छलफल भई निर्णयार्थ पेश हुने र बजेट पास गर्ने कार्यसूची तय भएको हो । विनियोजन विधेयक माथिको छलफल हिजो नै सकिएको छ ।
विषयगत मन्त्रालयको बजेटमाथिको छलफल सोमबार सुरु भएको थियो । छलफलमा सत्तापक्षले सरकारले ५ वर्षमा सबैभन्दा राम्रो बजेट ल्याएको भन्दै स्वागत गरेका थिए ।
उनीहरुले सरकारले ल्याएको बजेट जनमुखी रहेको भन्दै बजेटको प्रशंसा समेत गरेका थिए । प्रमुख प्रतिपक्षी दल नेकपा एमालेसहितका प्रतिपक्षी दलले भने सरकारले चुनावलक्षित, परम्परागत शैलीमा, असन्तुलित बजेट ल्याएको भन्दै विरोध गरेका थिए ।
हिजो प्रदेशसभालाई सम्बोधन गर्दै बागमती प्रदेशका मुख्यमन्त्री राजेन्द्रप्रसाद पाण्डेले सरकारले आगामी आर्थिक वर्षको लागि ल्याएको बजेट प्रगतीशील र जनमुखी भएको दाबी गर्नुभएको थियो ।
