काठमाडौं – प्रधानमन्त्री एवं नेपाली काँग्रेसका सभापति शेरबहादुर देउवाले गठबन्धनलाई निरन्तरता दिनेबारेमा पार्टीभित्र विवाद नरहेको बताएका छन् ।
बिहीबार काठमाडौंमा आयोजित एक कार्यक्रममा बोल्दै प्रधानमन्त्री देउवाले पार्टीको केन्द्रीय समिति बैठकले नै गठबन्धन निरन्तरता दिने बिषयमा निर्णय गरेको स्पष्ट पारे ।
पार्टीको केन्द्रीय समिति बैठकले गठबन्धनलाई सँगै लाने निर्णय भन्दै यसमा कुनै पक्षको फरक मत नरहेको उनले दाबी गरे ।
साथै उनले कुनै पनि हालतमा काँग्रेस गठबन्धनको विपक्षमा जान नसक्ने बताउदै बरु अझ एकाबद्ध भएर अघि बढ्ने उल्लेख गरे ।
उनले अप्ठ्यारा र असहजलाई मिलाउने जिम्मा प्रधानमन्त्रीको जिम्मा भएको भन्दै असहज परिस्थितिसँग आफू नभाग्ने जनाएका छन् ।
‘हाम्रो पार्टी कुनै पनि हालतमा गठबन्धनको विपक्षमा छैन । गठबन्धनलाई अझ एकतावद्ध बनाएर लैजान प्रतिवद्ध छु,’ उनले भने, ‘अप्ठेराहरुलाई फुकाउने र मिलाउने काम प्रधानमन्त्रीको हो, अप्ठेरासँग भाग्दिनँ।’
