दाङ,
लुम्बिनी प्रदेश अन्तर्गतको राष्ट्रिय सभा सदस्य उपनिर्वाचनमा नेपाली कांग्रेसका उम्मेद्वार दृगनारायण पाण्डेय विजयी हुनु भएको छ । नेकपा एमालेका उम्मेदवार चन्द्रबहादुर खड्कालाई ५ सय २८ मतभारले पराजित गर्दै पाण्डेय विजयी हुनु भएको हो । पाण्डेयले ४ हजार एक सय ४० मत ल्याउँदा खड्काले ३ हजार ६ सय १२ मत पाउनु भएको निर्वाचन आयोगले जनाएको छ ।
आजको मतदानमा २ सय ९७ जनाले मतदान गरेका थिए । त्यसमध्ये स्थानीय तहतर्फ खसेको २ सय १२ मध्ये पाण्डेयले एक सय १८ मत पाउनुभएको थियो भने एमालेका उम्मेदवार खड्काले ९४ मत पाउनु भएको थियो । प्रदेश सभाका ८३ मतमध्ये एक मत बदर भएको थियो । पाण्डेले ४२ मत पाउँदा खड्काले ४० मत पाउनु भएको निर्वाचन आयोगले जनाएको छ ।
नेपाली काँग्रेसका उम्मेदवार पाण्डेयलाई नेकपा माओवादी केन्द्र, नेकपा एमालेको माधवकुमार नेपाल समूह र जसपाको बाबुराम उपेन्द्र पक्ष र राष्ट्रिय जनमोर्चाको समर्थन थियो । यसअघि नेकपा एमालेका तर्फबाट लुम्बिनी प्रदेशसभा सदस्य रहनु भएका पाण्डेय सांसदबाट राजीनामा दिएर काँग्रेसमा प्रवेश गर्नुभएको थियो ।
नेकपा एमालेका तर्फबाट उम्मेद्वार रहनुभएका खड्का यसअघि माओवादी केन्द्रका तर्फबाट राष्ट्रिय सभा सदस्य हुनुहुन्थ्यो । एमालेमा प्रवेश गरेपछि माओवादीले उहाँलाई कारबाही गरेको थियो ।
