काठमाडौं,
नेपाली सेयर बजारको इतिहासकै सबैभन्दा ठूलो परिमाणमा निष्काशन गरिएको नेपाल इन्फ्रास्ट्रक्चर बैंक (निफ्रा) को आईपीओ शुक्रबार बाँडफाँट गरिएको हो । योग्य आवेदकमध्ये ४ लाख ९२ हजार ७७ जनाले ६० कित्ताका दरले सेयर हात पारेका छन् ।
बाँकी सबै योग्य आवेदकलाई ५० कित्ताका दरले सेयर परेको क्यापिटलले जनाएको छ । निफ्राको आईपीओ निष्काशन तथा बिक्री प्रवन्धकको जिम्मेवारी पाएको एनआइबीएल एस क्यापिटलले १४ लाख ७५ हजार ८० वटा योग्य आवेदन परेको जनाएको छ ।
क्यापिटलका अनुसार ६० कित्तासम्म माग गरेका योग्य आवेदकहरु सबैले आवेदन दिए अनुसार नै सेयर हात पारेका छन् । मानौं, तपाईले १० कित्ताका लागि आवेदन दिनु भएको छ भने १० कित्ता र ५० कित्ताका लागि आवेदन दिनु भएको छ भने ५० कित्ता नै परेको छ ।
६ हजारभन्दा धेरैको आईपीओ आवेदन भने रद्द भएको छ । बैंकले ८ अर्ब रूपैयाँ बराबरको ८ करोड कित्ता सेयर प्रारम्भिक निष्कासन गरेको थियो । ८ करोडमध्ये १ लाख ६० हजार कित्ता कर्मचारीका लागि र ४ लाख कित्ता म्यूचअल फण्डका लागि जानेछ ।
बाँकी ७ करोड ५८ लाख ४० हजार कित्ता साधारण सेयर भने सर्वसाधारणका लागि छुट्याइएको थियो । आईपीओमा मागभन्दा २.३९ गुणा बढी आवेदन परेको थियो । आईपीओमा १५ लाख २९ हजार ४६० जना आवेदकले १८ अर्ब १२ करोड ८६ लाख ७२ हजार रुपैयाँको १८ करोड १२ लाख ८६ हजार ७२० कित्ताको लागि आवेदन दिएका थिए ।
