६० विषयमा हुने निःशुल्क तालिममा माघ २५ सम्म आवेदन दिन पाइने

काठमाडौं,

सीपमूलक, सीप अभिवृद्धि तथा उद्यमशीलता विकास तालिम लिन इच्छुक व्यक्तिका लागि अनलाइन आवेदन दिने समय माघ २५ गतेसम्म थपिएको छ । गत महिना उद्योग, वाणिज्य तथा आपूर्ति मन्त्रालय अन्तर्गतको लघु, घरेलु तथा साना उद्योग प्रवर्द्धन केन्द्रले उद्यम व्यवसाय गर्न इच्छुक व्यक्तिहरुबाट ६० भन्दा बढी तालिममा निःशुल्क सहभागी हुन अनलाइन आवेदन माग गरेको थियो ।

मितव्ययीता र मुलुकभरबाट सहजै आवेदन दिन सकियोस् भन्ने उद्देश्यका साथ अनलाइन आवेदनको व्यवस्था मिलाइएको र छुटेकाहरुले यहि माघ २५ गतेसम्म अनलाइनबाट आवेदन दिन सक्ने केन्द्रका कार्यकारी अधिकृत पुष्पराज शाहीले जानकारी दिनुभयो ।

साथै उक्त तालिम सञ्चालनका लागि केन्द्रले आवश्यक प्रशिक्षकको रोस्टर समेत तयार पार्ने भएको छ । त्यसका लागि योग्य व्यक्तिले सूचीमा समावेश हुन दरखास्त दिन सक्नेछन् ।

१८ वर्ष पुरा भएका नेपाली नागरिकले तालिममा सहभागी हुन पाउने छन् । त्यसका लागि यस अघि आधारभूत तालिम लिएको कागजात र कुनै पेशा वा व्यवसायमा आवद्ध भए त्यस्तो पेशा व्यवसाय स्तरोन्नती गर्ने व्यवसायिक योजना पेश गर्नुपर्नेछ ।

एक जनाले दुईभन्दा बढी तालिमको आवेदन दिन नपाउने केन्द्रले स्पष्ट पारेको छ । आवेदन दिनेमध्ये छनौट भएका प्रशिक्षार्थीहरुलाई वेबसाइट तथा ईमेलमार्फत तालिम सञ्चालन हुने समयावधी, स्थान, मिति र समयको जानकारी गराइने कार्यकारी अधिकृत शाहीले जानकारी दिनुभयो ।

यस्तो छ निःशुल्क तालिमको विवरण