काठमाडौं,
प्रधानमन्त्री केपी शर्मा ओलीले हिमाल आरोहण जोखिमपूर्ण हुने भन्दै सहज भएको भए आफू पनि आरोहणमा जान सक्ने बताउनुभएको छ । पाकिस्तानको माउन्ट केटु हिमाल हिउँदे सिजनमा आरोहण गरी कीर्तिमान कायम गरी फर्केका नेपाली आरोहीहरुलाई मंगलबार सम्मान गर्दै प्रधानमन्त्री ओलीले यस्तो बताउनु भएको हो ।
प्रधानमन्त्री ओलीले ठट्यौली शैलीमा माउन्ट केटु हिमाल आरोहणमा आफू पनि जान पाएको भए अझ बढी धुमधाम हुन्थ्यो होला भन्ने प्रतिक्रिया दिनुभयो । ‘आरोहण मुस्किल छ, कठिन छ, सजिलो भएको भए त प्रधानमन्त्री पनि यो टिममा हुन्थ्यो,’ उहाँले भन्नुभयो, ‘अझ बढी धुमधाम हुन्थ्यो । त्यो दुस्साहस गरेको भए म फर्केर आउने थिइन होला ।’
प्रधानमन्त्री ओलीले अब उप्रान्त राज्यले आरोहीलाई अवार्ड दिने घोषणासमेत गर्नुभएको छ । आरोहणको क्रममा अत्यन्त सावधानी अपनाउन सुझाव दिँदै उहाँले अनुभवलाई हल्का रुपमा नलिन समेत आग्रह गर्नु भएको छ । केटु हिमाल आरोही टिमको नेतृत्व गर्नुभएका निर्मल पुर्जाले नेपाल गरिब देश भएको भन्दै राज्यबाट सहयोग नपाएको बताउनु भएको थियो ।
‘देश गरिब भएपनि मन ठूलो छ । सोच फराकिलो छ। हामी सकारात्मक सन्देश विश्वभर पुर्याउन सफल भएका छौं । यसमा सबै टिम सदस्यको ठूलो योगदान छ। यो इतिहास अब कहिले पनि मेटिने छैन । आरोहणका दौरान हामीले नेपालको झण्डा लगेर गएका थियौं । यो झण्डा आज हामीले सम्माननीय प्रधानमन्त्रीज्यूलाई हस्तान्तरण गरेका छौं ।’ पुर्जाले भन्नुभयो ।
नेपालका १० जना पर्वतारोहीले यही माघ ३ गते पाकिस्तानस्थित माउन्ट केटु हिमालको हिउँद सिजनमा सफल आरोहण गरेका थिए । हिउँदयाममा विश्वको दोस्रो अग्लो माउन्ट केटु हिमाल आरोहण गरेर विश्व कीर्तिमान कायम गरेका नेपाली आरोहीहरु आज काठमाडौं फर्किएका छन् । उनीहरुलाई त्रिभुवन अन्तराष्टिय विमानस्थलमा भव्य स्वागत गरिएको थियो ।
