काठमाडौं,
यातायात व्यवस्था विभागले आजदेखि सवारीचालक अनुमतिपत्र (ड्राइभिङ लाइसेन्स) को अनलाइन आवेदनमा कोटा सिस्टम हटाएको छ । विभागले बिहीबार एक सूचना जारी गर्दै अब असीमित रुपमा अनलाइन आवेदन दिन सकिने जनाएको हो ।
अनलाइन फर्म भरेका सेवाग्राहीले तोकिएको मितिमा लिखित परीक्षाका लागि भने यातायात कार्यालय जानुपर्ने सूचनामा भनिएको छ । यसैबीच विभागले हालका लागि अनलाइन फर्म भर्दा नियमित रूपमा प्राप्त गरेको एसएमएस सेवा केही समयका लागि बन्द गरेको जनाएको छ ।
एसएमएस सेवा सुचारू नहुँदासम्म आफ्नो रजिस्ट्रेशन नम्बर सुरक्षित गरी सम्बन्धित कार्यालयमा तोकिएको मितिमा सम्पर्क गर्नुपर्ने सो सूचनामा उल्लेख छ । अनलाइन सिस्टममा सुधार गरी आजबाट अनलिमिटेड फारम भर्न सकिने व्यवस्था गरिएको विभागका प्रवक्ता लोकनाथ भुसालले जानकारी दिनुभयो ।
यसअघि हरेक दिन लाइसेन्स वितरण गर्ने कार्यालयहरुले आफ्नो क्षमताअनुसार निश्चित कोटा तोक्ने र त्यसैअनुसार मात्रै अनलाइन फारम भर्न मिल्ने व्यवस्था गरेका थिए । यस अनुसार दैनिक ४ देखि ५ हजारले मात्रै लाइसेन्सको आवेदन दिन पाउँथे । अनलाइन आवेदनको प्रणाली खुल्नासाथ एकैपटक हजारौं सेवाग्राहीले यातायात व्यवस्था विभागको वेबसाइट खोल्दा प्रणालीमै समस्या देखिएको थियो ।
