काठमाडौं,
काठमाडौंमा जारी त्रिकोणात्मक टी २० शृंखलामा नेपाल एक खेल अगाडि नै फाइनलमा प्रवेश गरेको छ । नेपालले फाइनलमा अब नेदरल्यान्ड्ससँग नै प्रतिस्पर्धा गर्नेछ । बुधबारको खेलमा नेदरल्यान्ड्स र मलेसियाले अंक बाँडेपछि नेपाल एक खेल अगावै फाइनल पुगेको हो ।
नेपालले लिग चरणको अन्तिम खेल मलेसियासँग बिहीबार खेल्दैछ । ३ खेलबाट मलेसियाको एक अंक मात्रै रहेको छ । ४ खेलबाट नेदरल्यान्ड्सको ५ अंक रहेको छ भने नेपालले ३ खेलबाट ४ अंक बनाएको छ । बिहीबारको खेलमा पराजित भए पनि नेपाल मलेसियाभन्दा अगाडि नै रहन्छ ।
वर्षाका कारण १३ ओभरमा छोट्याइएको खेलमा नेदरल्यान्ड्सले ४ विकेट गुमाउँदै एक सय ७ रन बनाएको थियो । टस हारेर पहिले ब्याटिङ गरेको नेदरल्यान्ड्सले ११ औं ओभरमा तीन विकेट गुमाएर ६८ रन बनाउँदा वर्षाका कारण खेल रोकिएको थियो । त्यसपछि खेल १३ ओभरमा झारिएको थियो ।
वर्षाले फेरि खेल प्रभावित भएपछि डीएल मेथडमार्फत मलेसियालाई १३ ओभरमा एक सय २० रनको लक्ष्य दिइएको थियो । छैटौं ओभरको समाप्तिपछि मलेसियाको लक्ष्य पुनः संशोधन गरिएको थियो । अब मलेसियाले जितका लागि १० ओभरमा ९२ रन बनाउनुपर्ने थियो । तर मलेसियाले १० ओभरमा ४ विकेट गुमाउँदै ९१ रन बनाएपछि खेल बराबरी भएको हो ।
