काठमाडौं,
विवादका बीच सामुदायिक रेडियोहरुको छाता संगठन सामुदायिक रेडियो प्रसारक संघ (अकोराब) नेपालको १५ औँ साधारणसभा तथा सातौँ अधिवेशन मँगलबार काठमाडौंमा सुरु भएको छ । संघका अध्यक्ष सुवास खतिवडा र महासचिव गोविन्द देवकोटाले असहज परिस्थिति भन्दै स्थगनको सूचना जारी गर्नुभएपछि केहि समय अलमल भएको थियो ।
बरिष्ठ उपाध्यक्ष अर्जुन गिरीको अध्यक्षतामा अधिवेशनस्थलमा आकस्मिक बैठक बसी साधारणसभा र अधिवेशन जारी गर्ने निर्णय भएपछि साधारणसभा सुरु भएको थियो । प्रमुख अतिथिबीना बरिष्ठ उपाध्यक्षको अध्यक्षतामा सुरु भएको साधारणसभामा अध्यक्ष र महासचिव भने उपस्थित हुनु भएन ।
अधिवेशनमा सहभागी हुन देशभरिका ३ सय सामुदायिक रेडियोकर्मीहरु राजधानी काठमाडौं आइपुगेका छन् । पहिलो दिन साधारणसभा उद्घाटन भयो भने बन्द शत्र सुरु भएको छ । दोस्रो दिन आज बन्द शत्रको बाँकी प्रक्रिया सकेर नेतृत्व चयानका विषयमा छलफल गर्ने कार्यक्रम तय भएको बरिष्ठ उपाध्यक्ष अर्जुन गिरीले बताउनुभयो ।
अधिवेशनले सामुदायिक रेडियोको नयाँ नेतृत्व चयन गर्नेछ । सबै पक्षलाई समेटेर लैजाने विषयमा पहल भइरहेको उहाँको भनाइ छ । नयाँ नेतृत्व चयनसँगै देशभरिका सामुदायिक रेडियो सञ्चालन, तिनीहरुले उत्पादन गर्ने सामग्रीका विषयमा पनि समीक्षा हुनेछ ।
सामुदायक रेडियो प्रसारक संघ ९अकोराब० नेपालले सामुदायिक रेडियोको सामाजिक दायित्वलाई थप सशक्त बनाउँदै संस्थागत सुशासनका प्रवर्धनका लागि विभिन्न काम गर्दै आएको छ । नेपालका करिब ९५ प्रतिशत नागरिकको पहुँच पुगेका सामुदायिक रेडियोहरुले ७० भन्दा वढी भाषामा सूचना, सन्देश, जानकारी र मनोरञ्जनात्मक कार्यक्रमहरु प्रसारण गरिरहेका छन् ।
