हेटौंडा,
बागमती प्रदेश लोकसेवा आयोगले सहायकस्तर पाँचौं तहको विभिन्न एक सय २९ पदका लागि भएको परीक्षामा ५ हजार ८ सय ८३ जना अर्थात ७० दशमलव २८ प्रतिशत सहभागी भएका छन् । शनिबार हेटौंडा र भरतपुरमा भएको परीक्षामा फारम भरेका ८ हजार ३ सय ७० मध्ये २ हजार ३ सय १४ महिला र ३ हजार ५ सय ६९ पुरुष सहभागी भएको प्रदेश लोकसेवा आयोग बागमतीका निमित्त सचिव भोला दाहालले जानकारी दिनुभयो ।
बागमती प्रदेशका विभिन्न स्थानीय तहहरुमा रिक्त रहेका प्रशासन सेवा सामान्य प्रशासन, लेखा र आन्तरिक लेखापरीक्षण सहायकस्तर पाँचौं तहको एक सय २९ पदका लागि हेटौंडाका २८ र भरतपुरका १४ गरी ४२ वटा परीक्षा केन्द्रबाट परीक्षा सञ्चालन गरिएको उहाँको भनाइ छ ।
अनलाइन दरखास्त प्रणालीबाट पहिलो पटक प्रदेशस्तरमा ऐतिहासिक रुपमा लिखित परीक्षा सफलतापूर्वक सम्पन्न गरेको प्रदेश लोकसेवा आयोग बागमती प्रदेशले जनाएको छ ।
