काठमाडौं,
नेपालमा कुखुराको कुनै पनि प्रजातीमा बर्ड फ्लुको संक्रमण नदेखिएको कृषि तथा पशुपन्छी विकास मन्त्रालयले जनाएको छ । बिगत एक महिनादेखि भारतका विभिन्न सहरमा फैलिएको बर्ड फ्लु नेपालमा पनि पुष्टी भएको तर कुखुरामा अहिलेसम्म नदेखिएको बताइएको छ ।
काठमाडौंको तारकेश्वर नगरपालिका ७ साङ्लेखोलामा स्थानीय किसानले पालेको टर्की र हाँसमा बर्ड फ्लु पुष्टी भएको मन्त्रालयका प्रवक्ता डा. श्रीराम घिमिरेले बताउनुभयो । अघिल्लो वर्ष काठमाडौंमा देखिएको बर्ड फ्लुको संक्रमण पनि सोही क्षेत्रमा थियो ।
संक्रमण पुष्टि भएको क्षेत्रका झण्डै २ हजार ३ सय हाराहारी पन्छी नष्ट गरिएको र निसंक्रमण पनि गरिसकिएको छ । अन्यत्र पनि रोगको जोखिम बढेका कारण बर्ड फ्लु रोकथाम तथा नियन्त्रण सम्बद्ध सबै निकायलाई सतर्क हवस्थामा राखिएको पशु सेवा विभागले जनाएको छ ।
उपभोक्ता त्रसित हुनुनपर्ने
व्यवसायिक रुपमा कुखुरा तथा हाँसका फर्ममा बर्ड फ्लु नदेखिएका कारण तत्काल उपभोक्ता त्रसित हुनुनपर्ने पशु सेवा विभागले जनाएको छ । बर्ड फ्लु फैलिनसकेकाले आफ्नो फर्म जोगाउन व्यक्तिगत तथा जैविक सुरक्षा अपनाउन अझै समय रहेको भन्दै विभागले किसानलाई सचेत गराएको छ ।साथै स्थलमार्ग तथा उडेर आउने चराचुरुङ्खीको सम्पर्कबाट आफ्नो फार्म जोगाउन भनेको छ ।
एक प्रकारको संक्रामक भाइरस बर्ड फ्लू संक्रमणबाट चराचुरुङ्गीमा श्वासप्रश्वास गर्न कठिन हुन्छ । यो संक्रमण कहिलेकाहीँ मानिसमा पनि सर्छ । मानिसबाट मानिसमा भने यो रोग सर्दैन । उच्च ज्वरो आउनु, खोकी लाग्नु, पेट, घाँटी, छाती तथा मांसपेशीहरु दुख्नु तथा पखाला लाग्नु र श्वासप्रश्वासमा समस्या आउनु बर्ड फ्लुको मुख्य लक्षण हुन् ।
